Tied leep dèks aon diech veurbij
Tied waor neet vaan diech of vaan miech
Tied leep noets in de rij
Meh daan, obbins keump de beslissende tied langszij
In al die leevens biste soms 'ne gemekeleke tied,
soms 'ne zwoere tied tegegekoume
Mèt d'n tied biste soms good, soms slech weggekoume
Dèks höbste geprebeerd mèt d'n tied euvereintekoume
Alles en ederein en ouch diech mós oet de oondervinding wèlle liere
'ne Lèstege zwoere tied beslis welke weeg diech geis insloon
Welke bagaasj geit oontstoon
Of ste wouws liere vinde de "Aleinege Wet"
Gooj en slechte bagaasj, in eder leeve zalste ze mote mètnumme
Gooj bagaasj is altied 'n hölp
veur dat wat ste in 'n volgend leeve geis oondernumme
um de "Aleinege Wet" te vinde
D'n slechte bagaasj liet d'ch zien, de blinne
Zoe metein weurt veur wienege 't alles beslissende Ete opgedeend
't Ete aon dat allerlèste bankèt
moot eedere mins veur z'n eige verdene
Te väöle dachte, 't leeve is allein mer cabberèt
Te väöle zien aon die lèste taofel neet mie aongezete
't Aajd book mins is vol gesjreve
Ouch dien aajd book weurt touwgedoon
In 't nuij book mins is nog gein blaad besjreve
Veur wienege weurt 'n nuij, onbesjreve book opegedoon
De Zeuktoch
Eder leeve in edere tied waor 'n pèlgrimaasj
Niemes kós 'n leeve euversloon
Edere mins mós väöle leevens oondergoon
Op dee lange weeg door die väöle leevens
höbste sommege zwoer gevechte gewónne
De höbs 'n bitsje rieke bagaasj
Aon de "Aleinege Wet" höbste nog neet voldoon
Meh de dreugs toch al einege rieke kleiaasj
Aon 't allerlèste bankèt kinste daan plaots neume
De zals weer wijer op weeg mage goon
De weeg vaan d'n lèste pèlgrimaasj
