Dao boe Maos en Jeeker samekoome is e keend geboore vaan väöl krach
Ut keend woort un vrouw sjoen en vol vaan prach
Väöl is häör euverkoome väöl is mèt häör gebäörd
Alles heet ze doorstande, alles heet ze volbrach
Meh noe höbbe vreemdelinge häör in bezit genoome
die höbbe häör misleie, misbruuk, verkrach
Häör pijn en verdreet zien hiel groet
bekans waor ze doed
Wee zaog häör traone in dit leeve
Boe is dee mins gebleeve
Wee wèlt häör hart noch winne
Wee wèlt häör noch beminne
Bekans alles is häör aofgenoome
Leeggestoole
Vervlooge is häör prach
Ut Vriethof, de Merret en Aw Maosbrögk
wee kint ze noch terök
D'n oorlog is noe oetgebrooke
Deen oorlog heet z'n spoore naogelaote
De lui höbbe häör verlaote
In häör kèrke en hoeser woed un lèste gevech
Ouch die mach weurt aofgebrooke
Ouch dee strijd weurt noe beslech
Al die valsegheid mót noe goon
Niks blijf mie bestoon
Eine is häör noets vergeete
Eine stoond altied aon häör zij
Daodoor is zie neet bezweeke
Daodoor is ze noch altied hei
Eine blijf noe altied euver häör wake
Valsegheid zal häör noets mie rake
Noe bezit zie edere mach
Kin ze weer bouwe aon häör aw prach
Meh wee zal zoe astrein häör noch herkinne
wee zal zoe astrein häör noch mage beminne