D'r waor 'ne mins dee de beteikenis vaan 't leeve wèlde vinde
Heer begreep, es te wèls liere móste wèlle oondervinde
Heer ging op weeg
Oondervoond al gaw,
dee weeg is 'ne kruusweeg
Ondervoond al gaw,
dee weeg is 'ne lange, zier einzaome weeg
Dee lange, einzaome weeg ging heer loupe
Wis neet wie 't mèt häöm zouw aofloupe
Op dee weeg zaog heer väöl strukelende lui,
aongevalle door väöle "zuchte"
Op dee weeg, elke kier opnui
Heer ging liere dao tege te vechte
Wèlde ziech neet laote knechte
Prebeerde te kruusege eedere "zucht"
Ging veur häör neet op de vlöch
Prebeerde häör neet te bevröchte
Elke kier op nui 'ne aonval vaan dat water
'n Stortbui vaan al die versjèllende "zuchten"
Wie 'n machteg donderende waterval
Slevenier sjikde häöm hölp
Väöl versjèllende lui kaom heer tege
Vaan lui gevaange in 'n "zucht" lierde heer
Soms waore häöm lui genege
Dèks ouch neet
Al die lui waore oeteindelek veur zien oonderwies 'n zege
D'n ingeslage weeg kós heer vervolge
Heer hoofde ziech neet tröktetrèkke in zien sjölp
Aander zeukende lui wouwe ziene weeg ouch volge
Ze zochte bij elkaar hölp
De groete mach vaan die donderende waterval heet heer begrepe
Veur häöre stortvloed aon water is heer neet bezweke
Ziene weeg is häöm bekind
Löp nog altied neet nao zien ind
In de woere beteikenis vaan 't leeve kin heer ziech noe weier verdepe
