Toen de mins zien aontal oonbesjeemp leet greuje
begós heer ummertouw sterker ziech mèt dees eerd te bemeuje
Massafabricaasj ging oontstoon, kaom in de han vaan 't Groete Geld
en woort 'n dwingend geweld
Väölheid woort aonbeede
Aondach veur sjoenegheid hielemaol gemeede
Massafabricaasj zörgde op dees planeet
veur d'n allergroetste ravaasj
't Groete Geld ging euver lieke
Sjoenegheid mós mer oetwieke
Lielekheid woort in fèlheid geboore
Sjoenegheid heet toen hiel väöl verloore
Meh vergeet noets, zie is 't fundamint vaan eus bestoon
Zoonder häör höbbe veer geine weeg mie te goon
De mins kós groetere sjoenegheid aon de stein geeve
In aw Gesjrifte kóste veer dat leeze
Häör leefde veur eus is nog ummertouw groet
Häör leefde veur eus, nog altied neet doed
Väöle, zier väöle zien veur 't exame Sjoenegheid gezak
Dee lèste kans neet gepak
De mins zal häör vaan häör traone mote bevrije
De sjoenegheid vaan hiel vreuger veur häör weer mote inwije
Dat is neet te vermije
Mach Sjoenegheid, allein zie heet euver dees planeet eeder gezag
De lui die häör bleeve leefhöbbe, aon die lui heet zie altied gedach
Zoe dalek toent zie häör Mach !