'n Iezere Mathematische Wèt Gesjreve en geïllustreerd door Jef Franssen
Zoonder um te kieke
heet de mins vaan ziene naoste
ummertouw alles wèlle numme
Zoonder um te kieke
de mach euver plant bies en stein
wèlle euvernumme
Zoonder um te kieke
ziene naoste zier väöl pijn gedoon
Noets waor 't un harmonisch samegoon
Same mèt plant bies en stein bewoent de mins dees Eerd
De aleinege Wèt "Het Elkander" is allein door
plant bies en stein getoend
"Het Elkander" waor veur plant bies en stein
altied de groetste, de aleinege pliech
Dees Eerd zal in d'n tied vaan noe 'n gans aandere weeg insloon
't Dwingende book gesjreve door de mins
weurt veur altied touwgedoon
Al datgene wat de mins ziene naoste wouw aufnumme
deeg de vraak vaan de wereld vaan "De Machte"
allein mer touwnumme
In deze tied goon de naoste de mins niks mie geeve
Zie toene zoe metein 'n gans aander geziech
Ouch de mach euver de stein zal de mins veur altied
moote aofgeve
Alles wat heer de stein heet aofgenome
weurt aon de stein trök gegeeve
De door de mins genome energie vaan de stein
oontvink de stein trök
D'n tied vaan herstèl tollereert gein langer oetstèl
Al die weggenome energie toent zoe metein
'n noets getoende, zwoere aofdrök
Rehabilitatie, 'n iezere Mathematische Wèt
Zier binnekort zuut de mins d'n ierste aonzèt
De Sjöpings-Krach vaan Slevenier heet
door dees Eerd energie lijne getrokke
Land en zie rös op die lijne,
alle land en elke zie is hei bij betrokke
De continente, de oceaone en 't magnetisch veld
weure door die väöle lijne op z'n plaots gehawwe
Zie en land weurt door energie oetereingehawwe
Door de zier groete hoeveelheden genome energie
versjuiv de lijn, versjuiv 't magnetisch veld
en
verdwijnt zoe metein väöl land en väöl zie
Land weurt zie, zie weurt land
Neet altied boe de mins de energie naom
meh ouch op aander plaotse zal land en zie in elkaar euvergoon
'n Harmonisch gebruuk vaan de energie vaan de stein
heet bij de mins zien dinke noets mètgedoon
De minachting veur de naoste heet besjik
't Is de mins dee dees Eerd in brand stik